Кейінгі екі жылда Қазақстан картасынан 80 ауыл жоғалып кеткен. Бұл туралы Мәжілісте ауылдық аумақтарды дамыту мәселелері жөніндегі дөңгелек үстел барысында депутат Жигули Дайрабаев мәлімдеді, деп хабарлайды barysmedia.com.

Депутаттың айтуынша, 1 қазан 2023 жылғы ресми деректерге сәйкес, ел халқының 37,2 пайызы ауылдық жерлерде тұрады. Алайда, жыл сайын бұл көрсеткіш төмендеп барады.

“Қазіргі таңда Қазақстанда 6208 ауыл бар, ал 2023 жылы олардың саны 6286 болған. Осылайша, небәрі екі жыл ішінде 80 ауыл жойылып, елді мекендердің саны азайды. Ұлттық статистика бюросының мәліметінше, 2023 жылы ауылдардағы көші-қон сальдосы – 111 400 адамды құрады, бұл ауылдан қалаға көшкендердің көп екенін көрсетеді”, – деді депутат.

Оның айтуынша, бұл көрсеткіш соңғы 25 жылдағы ең төменгі деңгейге жеткен.

“Алматы және Атырау облыстарын қоспағанда, барлық өңірде көші-қон сальдосы теріс мәнге ие. Әсіресе, Түркістан облысында жағдай күрделі, бұл өңірден 29,2 мың адам көшіп кеткен“, – деді мәжілісмен.

Депутат ауылдардың азаюы мен халықтың жаппай көшуі ауылдық аймақтарды дамыту мәселесіне ерекше назар аударуды талап ететінін айтты.