ҚР Қаржы министрлігі “Google салығы” енгізілгелі бері шетелдік интернет компаниялар Қазақстанға қанша салық төлегенін айтты, деп хабарлайды barysmedia.com.

Қаржы министрлігінің мәліметінше, қазіргі уақытта елімізде осы талап бойынша 101 шетелдік компания тіркелген.

Олардың қатарында жаһандық деңгейдегі: Huawei, Aliexpress, Google, Apple және Netflix секілді алпауыттар бар.

Үш жыл ішінде бұлардың бұғалтериясынан мемлекет қазынасына 75 млрд теңге салық түскен, ал соңғы бір жылда аударылған салық сомасы 35 млрд теңгені құрады.

Былтырғы жылдың соңында TEMU, Pinduoduo және Alibaba тобы тіркеуден өтіп, “Google салығын” төлейтіндердің қатарына қосылды.

Ережеге сай, "Google салығы" қазақтарға тауар не цифрлық қызмет көрсететін шетелдік компаниялардың бәріне қолданылады. Айталық, Netflix немесе Apple өз өнімдері мен цифрлық сервистерін ұсынса, олар сатылған немесе пайдаланылған әрбір қызмет пен тауардан тиісті салық төлеуге міндетті.