Ұлттық статистика бюросы Қазақстанда баспана бағасы бір жылда 4 пайызға көтерілгенін мәлімдеді, деп хабарлайды barysmedia.com.

Өсім, әсіресе, Павлодар, Ақтөбе, Көкшетау қалаларында байқалады.

Екінші нарықтағы тұрғын үй мен жалға берілетін пәтер бағасы тұрақсыз күйде болса да, өткен жылы баспаналы болғандар аз болмаған. Бір жылдың ішінде тұрғын үйді сату және сатып алу бойынша шамамен 400 мың келісім жасалған.

“Баспана бағасы күрт қымбаттайды” деп алаңдауға негіз жоқ. Баға сұранысқа байланысты өзгереді. Қазіргі жағдайда доллар бағамының құбылуы, құрылыс материалдарының қымбаттауы сұранысты төмендетіп отыр. Сонымен қатар, тиімді ипотекалық бағдарламалардың аздығы да әсер етуде. Осы факторларды ескерсек, жыл соңына дейін баға 7 пайызға өсуі ықтимал. Алайда, қосылған құн салығына қатысты қабылданатын шешім нарыққа айтарлықтай ықпал етуі мүмкін”, – дейді Қазақстанның өзін-өзі реттейтін риэлторлар қауымдастығының президенті Лариса Степаненко.