2025 жылғы 1 шілдедегі жағдай бойынша, Қазақстанда 45,7 мың отбасы немесе 245,5 мың адам атаулы әлеуметтік көмек (АӘК) алуда. Бұл мақсатқа жалпы 16,2 миллиард теңге бөлінді. Ал 2025 жылға арналған республикалық бюджетте АӘК төлеуге 10,7 миллиард теңге қарастырылған, — деп хабарлайды barysmedia.com.

АӘК-тің басты мақсаты қандай?

АӘК – бұл өмірлік қиын жағдайда қалған отбасыларға мемлекет тарапынан көрсетілетін қолдау тетігі. Оның негізгі мақсаты:

• Ақшалай көмек көрсету;
• Отбасының еңбекке жарамды мүшелерін жұмысқа орналастыруға жәрдемдесу;
• Жағдайы төмен отбасыларды толыққанды еңбек нарығына бейімдеу.

АӘК қандай қолдау түрлерін қамтиды?

Атаулы әлеуметтік көмек келесі бағыттарды қамтиды:

1. Кедейлік шегінен төмен табысы барларға тоқсан сайынғы төлем

Кедейлік шегінен төмен табыс табатын азаматтарға тоқсан сайын қаржылай көмек тағайындалады.

2. 1-6 жасқа аралығындағы балаларға ай сайынғы төлем

Әлеуметтік аз қамтылған отбасылардағы 1-6 жас аралығындағы балаларға ай сайын 1,5 АЕК (айлық есептік көрсеткіш) мөлшерінде қосымша төлем төленеді.

2025 жылдың 1 шілдесіне дейін осындай 75,2 мың балаға 2,1 миллиард теңге көлемінде төлем жүргізілген.

3. Жұмыспен қамтуға жәрдемдесу

Отбасы мүшелерін еңбекке тарту мақсатында мынадай қолдау шаралары ұсынылады:

• жұмысқа орналастыруға көмек;
• кәсіби оқыту курстары (қажет жағдайда);
• жеке кәсіп ашқысы келетіндерге грант беру.

АӘК-ке өтініш қалай беріледі?

Атаулы әлеуметтік көмекке өтінішті келесі жолдармен беруге болады:

• Тұрғылықты жеріңіздегі мансап орталығында;
• Ауылдық округ әкімдігінде;
• Немесе Электрондық үкімет порталы арқылы: egov.kz

Кедейлік шегі қалай анықталады?

2025 жылғы 1 қаңтардан бастап кедейлік шегі өңірлік ерекшеліктерді ескере отырып есептеледі:

• Өңірлік медиандық табыстың 35%-ы, бірақ
• Өңірлік ең төмен күнкөріс деңгейінің 70%-ынан төмен болмауы тиіс.