Астана қаласында өтіп жатқан басты сот отырысында қоғам белсендісі Перизат Қайрат өзіне тағылған айыптарды мойындамайтынын мәлімдеді, – деп хабарлайды barysmedia.com.

Ол ақша жымқыру және алаяқтық жасау деректері бойынша айыпталуда. Бұл туралы сот отырысынан хабар таратқан ақпарат көздері мәлім етті.

Прокурорлар Перизат Қайрат пен оның анасы Ғайни Алашбаеваға қатысты айыптау актісін оқып шыққаннан кейін, процесте төрағалық етіп отырған судья Сабыржан Кәрімов айыпталушылардан тағылған айыптармен келісетін-келіспейтінін нақты сұрады.

“Мен айыптау актісімен келіспеймін. Мұндағы дәлелдер негізсіз. Тергеудің фантазиясы үшін жауапкершілікті өз мойныма алмаймын. Мен айыпты мойындамаймын. Кейін өзімді нақты деректермен қорғаймын”, – деді Перизат Қайрат сотта сөйлеген сөзінде.

Сотталушының анасы Ғайни Алашбаева да өзіне тағылған айыптармен келіспейтінін мәлімдеді.

Еске салсақ, бұған дейін судья БАҚ өкілдерінің қатысуы мен сот отырысы барысындағы шектеулерге қатысты түсініктеме берген болатын. Перизат Қайрат ісі бойынша сот процесі жалғасуда.