Мәжіліс депутаттары 21 ақпанда палатаның жалпы отырысында педофилия мен балаларды өлтіргені үшін өмір бойына бас бостандығынан айыру жазасын енгізетін заң жобасын бірінші оқылымда мақұлдады, — деп хабарлайды barysmedia.com тілшісі.

Мұндай нормалар «Қазақстан Республикасының кейбір заңнамалық актілеріне әйелдердің құқықтары мен балалардың қауіпсіздігін қамтамасыз ету мәселелері бойынша өзгерістер мен толықтырулар енгізу туралы» заң жобасына енгізілген.

Құжатты депутат Жұлдыз Сүлейменова таныстырды.

«Жаңа редакцияда, денсаулыққа қасақана ауыр зиян келтіргені үшін 3 жылдан 8 жылға дейін бас бостандығынан айыру қарастырылды. Сондай-ақ жаңа редакцияда денсаулыққа қасақана орташа зиян келтіргені үшін 2 жылға дейін бас бостандығынан айыру қарастырылды.

Балалардың құқығын қорғау саласында 2 жаңа норма қарастырылды. Жаңа редакцияда педофилия үшін өмір бойына бас бостандығынан айыру қарастырылды. Жаңа редакцияда баланы өлтіргені үшін өмір бойына бас бостандығынан айыру қарастырылды», — деді ол.

Сондай-ақ Жұлдыз Сүлейменов азаптауға байланысты да жаңа норма барын жеткізді.

«Жаңа редакцияда азаптау үшін 600 сағатқа дейін қоғамдық жұмысқа жегу не 3 жылға дейін бас бостандығынан айыру жазасы қарастырылды», — деді депутат.

Сонымен қатар, ол отбасының шырқын бұзатындар жазадан тыс қалмайтынын айтты.

«Егер отбасында ойран салған азаматтың басқа тұрғын үйі болса, оның жәбірленушімен бір тұрғын үйде тұруына сот арқылы тыйым салатын норма болды, бірақ ол жұмыс істеген жоқ. Жаңа редакцияда, зорлық-зомбылықа ұшыраған адамды қорғау үшін сот ерекше жағдайларда отбасында жанжал шығарып, құқық бұзған адамды белгілі бір мерзімге жарымен, бала-шағасымен бірге тұруға тыйым салу түріндегі құқықтық ықпал ету шарасын қолдануға құқылы», — деді Жұлдыз Сүлейменова.

Дауыс беру нәтижесінде заң жобасы бірінші оқылымда мақұлданды.